TACLOBAN CITY- Nadiskubrehan an patay nga lawas han usa nga lalaki ha sulod hiton abandonado nga kotse ha Barangay 77,Tabuan Fatima Marasbaras, Tacloban City.
Ginkilala an biktima nga hi alyas Cyrus, 52-anyos, pedicab driver, ngan gin-aaligar nga waray permanente nga urukyan.
Sumala kan PLt. Ronabeth De Paz , Information Officer Tacloban City Police Office, dayon nagdumara hin imbestigasyon an mga kapulisan, mahuman nga maka-karawat hin tawag tikang ha pira na mga residente nga naka-kita han patay nga lawas.
Dugang pa han nasabi nga opisyal, nabaruan nga an sarakyan kun diin ine nakit-an in ginhihimo nga katurugan han nasabi nga lalaki.
Subay pa ha panginano han mga otoridad, nabaruan gihapon nga an lalaki in gin-aaligar nga kagagawas pala ha ospital han nakalabay nga Oktubre 7, mahuman nga ma-involve ha vehicular accident.
Ha pagkayana, naghuhulat pa an mga otoridad ha resulta han autopsy, kun anu an hinungdan han nagin kamatayon han nasabi nga biktima.
