TACLOBAN CITY – Usa nga patay nga balyena an nahisanglad ha pampang han kadagatan han Brgy. Bioso, Zumarraga, Samar.
Sumala kan Dr. Juan Albaladejo, Regional Director han Bureau of Fisheries and Aquatic Resources (BFAR) Regional Office 8, an mao nga beaked whale nga nakit-an in maabot ha 4.4 metros an kahilaba ngan 600 kilos an kabug-aton.
Subay ha inisyal nga imbestigasyon in posible nga naigo o namatay an balyena tungod han pagbuto tikang ha ilegal nga pag-gamit hin dinamita ha pangisda.
Nahibaruan manggud nga tungod ha mga pagbuto in naguguba an ecolocation han mga baylena ngan dolphins sanglit nawawarayan an mga ini hin direksyon.
Mahinunumduman nga han nakalabay la nga semana in usa nga Cuvier’s beaked whale ngan spinner dolphin gihapon an nastranded ha Brgy. Botaera Zumarraga, Samar kun diin ha pagkayana in nairelease na an mga ini mahuman nga marescue han mga otoridad.
