NATIONAL-Sumaka na ha 22 katawo an namatay ha landslide nga natabo ha Binaliw landfill ha Cebu City.
Sumala ha mga otoridad, natad-an an lawas han usa nga babayi ngan lalaki kanina alas 6:30 ngan 6:51 han aga yana nga adlaw, ika 15 han Enero.
Lain ha mga namatay, 18 naman katawo an nasamaran ngan presente nga ginpapa-tambal ha magkalain-lain nga ospital ha Cebu.
Samtang, 14 naman an nagpapabilin nga nawawara nga padayon naman nga ginbibiling han mga rescuer.
Nagbubuhat naman hin search and retrieval operations an Cebu City Diaster Risk Reduction and Management Office (CCDRRMO) upod an Philippine Coast Guard, Bureau of Fire Protection, ngan mga volunteer groups.
Sumala ha Department of Environment and Natural Resources (DENR), andam hira maghatag hin bulig ngan magpatuman hin mga pitad in mabuligan an mga naapetuhan han insidente.
Dugang pa han ahensya, ig-oobserbaran nira an kabutang han landfill agud nga dire na mautro pa an sugad nga panhitabo.
Sugadman ginlalauman nga madudugangan an basura ha Cebu ha mga masunod nga adlaw, labi na nga tiarabot na an Sinulog Festival, sanglit nanawagan an lokal nga gobyerno hin dugang nga suporta tikang ha mga ahensya.
