TACLOBAN CITY – Ginpusil patay an usa nga paragbaligya hin foam ha Sitio Campicas, Brgy Maduruto, Matuguinao, Samar.
Subay ha report tikang ha Police Regional Office 8, ginkilala an biktima nga hi Rene Mondego, 39 anyos ngan residente ha Brgy. Veriato, San Isidro, Northern, Samar.
Nagawas ha inisyal nga imbestigasyon han mga kapulisan nga nagsusudoy an biktima han iya baligya nga foam han tigda nala nga dumaop an waray pa kakilal-i nga suspek ngan ginpamumusil ini ha iba-iba nga parte han iya lawas nga nagin rason han dayon hini nga kamatayon.
Gindara an patay nga lawas hini ha Gandara, Samar para igpailarom ha post mortem examination.
Padayon naman nga ginpapanginano han mga kapulisan kon ano an motibo han krimen.
Nagbubuhat na liwat an mga ini hin imbestigasyon para makilal-an ngan madakop an suspek.
