LAWAAN, EASTERN SAMAR – Patay an usa nga parag-uma ha Sitio Calutan, Brgy Guinob-an, Lawaan, Eastern Samar mahuman nga tigbason han suspek.
Ginkilala an suspek kan alyas Dodoy, 28-anyos an pangidaron ngan residente han nasabi nga barangay, samtang waray naman ngarani an biktima.
Sumala kan Lawaan Municipal Police Station Officer in Charge, PLt. Jonathan Rivas, mayda personal nga delito an suspek ngan biktima nga nagresulta ha nasabi nga insidente.
Subay han inisyal nga imbestigasyon, ugsa pa mahitabo an panigbas in gintarhog daw han biktima an suspek nga papatayon ine niya kun magkita hira utro bisan anu nga oras ngan bisan diin nga lugar.
Kun diin, nahituman naman nga samtang nagbabaktas mag-usaan an biktima in nakit-an ine han suspek ngan dayun nga ginkalitan pagtigbasa gamit an dara hine nga sundang.
Nag-angkon naman hin mga tinigbasan hin duha nga tinigbasan ha luyo han ulo ngan ha kamot an biktima nga nagin rason han dayun nga kamatayon hine.
Gindara pa ine ha hospital ha Balangiga, Eastern Samar pero gindeklara na ine nga dead-on-arrival han attending physician hine.
Samtang, dayun naman nga naaresto an suspek ngan ginbasahan han katungod hine ngan gindara ha Lawaan Municipal Police Station.
Hapagkayana in napasakan na hin kaso an suspek.
