INTERNATIONAL – Magtitikang na an Papal Conclave, kun diin an mga Katoliko nga kardinal in nakatalaan pagpili han sunod nga santo papa, in magtitikang yana nga adlaw.
Mayda kabug-usan nga 133 nga mga kardinal nga mga elektor tikang ha 70 nga mga nasud an kwalipikado ha pagpili han masunod kan nawara nga Papa Francisco.
An mga kardinal in magpapabilin ha sakob han Kapilya Sistina ngan maggagahin hira hin panahon ha papamalandong ngan pagpili kun hin-o an masunod nga lider han Simbahan Katolika.
Ugsa an aktuwal nga pagtitikang han conclave, an mga kardinal in magdudumara hin final general congregation. Mag-aabri an conclave pinaagi hin usa nga banal nga misa nga pagtatambungan han ngatanan nga mga kardinal.
Igdidiri an mga kardinal nga makigkomunikar ha gawas han Sistine Chapel samtang an Batikano in mag-uutod gihapon han ngatanan nga mga signal han telepono ha sakob han ira teritoryo tinikangan alas 3PM,. (9PM, oras ha Pilipinas).
Magpapadayon ini tubtob nga mapili an bag-o nga papa.
Samtang, tungod han kadamo han mga kardinal, diri tanan hira matatagan hin kalugaringon nga kwarto ha Santa Marta guesthouse. An nahibilin, sumala han Vatican, in temporaryo nga maukoy ha Santa Marta Vecchia, usa pa nga guesthouse nga agsob gamiton han mga opisyales han Vatican.
