Iginduduso ni Senador Paolo Benigno “Bam” Aquino IV an pagpasar han Bill No. 267 agud pahitas-an an tinuig nga income tax exemption threshold tikang ha P250,000 tikadto ha P480,000.
Panuyo han nasabi nga panukala nga mapahitaas an mahiuuli nga sweldo o take-home pay han milyones nga empleyado nga Pilipino ha butngan han hitaas nga presyo han mga papliton.
Ha ilarom han panukala nga balaod, ngatanan han mga empleyado nga nakita hin kutob P480,000 kada tuig o purluminos P40,000 kada bulan in dire na iibanan hin income tax.
Panuyo hini nga bag-uhon an presente nga sistema ha ilarom han TRAIN Law (Republic Act No. 10963), kun diin an mga nakita la hin kutob P250,000 an libre ha buwis.
Mahitungod nga usa katuig na nga nakabinbin an bill tikang han igsalawad ini dida han Hulyo 8, 2025, gin aghat han senador an Kongreso nga himuon ini nga priority legislation ha utro nga pag-aabir han sesyon.
Sumala kan Aquino, dire na resonable an presente nga limitasyon mahitungod nga gumutiay na an kantidad han kita han mga molupyo o purchasing power durot han padayon nga inflation.
An matitipid nga salapi tikang ha buwis in magagamit han mga pamilya para ha mga pangunahon nga panginahanglan sugad han pagkaon, panlawas, ngan edukasyon.
Natuod an senador nga an mas hitaas nga disposable income in magpapakusog ha consumer spending nga makakabulig gihapon ha lokal nga ekonomiya.
