SAN MIGUEL, LEYTE – Pinakagintutukan han bungto han San Miguel, Leyte an parte han panlawas ha syahan nga 100 days han paglingkod ha termino.
Sumala kan San Miguel, Leyte Mayor Atty. Normal Sabdao, nagbutang hira hin pondo ha mga pribado nga hospital ha syduad han Tacloban ngan ha usa nga pribado nga hospital ha Barugo, Leyte, sugad man ha mga dagko nga government hospitals ha Leyte.
Pira ha mga government hospitals nga ginbutangan nira hin pondo in an Carigara District Hospital, Leyte Provincial Hospital, Governor Benjamin T. Romualdez General Hospital and Schistosomiasis Center, ngan iba pa.
Ha pribado nga hospital, nagbutang hira hin pondo nga P1.5 million partikular na ha Ace Medical Center, Divine Word Hospital, ngan RTR Medical Center.
Samtang, tag-P1 milyon naman an ira ginbutang nga pondo ha United Shalom Hospital ngan Mother of Mercy Hospital.
Panuyo han nasabi nga pitad nga agud waray na problemahon an mga San Miguelnon ha oras nga ma-admit an mga ine ha nasabi nga mga hospital, kun diin waray na babaydan ha hospital bill an mga maa-admit, ngan an doctor’s fee o professional fee nala an ira po-problemahon.
Samtang, ha mga empleyado naman han bungto, nagkamay-ada hira hin Memorandum of Agreement ha usa nga Health Maintenance Organization (HMO) kun diin ha oras nga ma-hospital o maa-admit an mga empleyado in waray na hira babaydan mahitungod nga an HMO na an mabayad han bill han mga ine kaupod an doctor’s o professional fee.
