TACLOBAN CITY – Ginpangunahan ni Pangulong Rodrigo Duterte an inagurasyon han bag-o nga Leyte Provincial Capitol ha Palo, Leyte kakulop nga adlaw Marso 17.
Naging mahugot an seguridad ha mao nga area nga gintambungan han mga tinaglawas han magkalain-lain nga ahensya han gobyerno sugadman hiton mga alkalde ha magkalain-lain nga lugar ha rehiyon 8.
Sumala kan Pangulong Rodrigo Duterte, kinahanglan nga tagan hin importansya han mga nadalagan yana nga mga kandidato an health care system sugadman an imprustuktura han nasud.
Naghatag gihapon an Pangulo hin pahayag bahin ha mga nawawara nga sabungero kun diin ha pagkayana in waray la gihapon kabibilngi pero mayda na daw lead an mga otoridad.
Samtang, nagpahayag gihapon an pangulo bahin ha “war on drugs” nga waray hiya magpresidente agud pumatay hin tawo sugadman an droga in nakakadistroso ha kabubuwason han mga katawhan labi ha mga kabataan.
Ginpangunahan gihapon ni Pangulong Duterte an partial nga paghahatag hin mga housing units nga namumutang ha Peace and Prosperity Village ha San Isidro, Leyte sugadman an pandidistribwer hin Certificates of Land Ownership Award (CLOA) ha mga representante han Agrarian Reform Beneficiaries (ARBs).
