TACLOBAN CITY – Ginpahibaro han Land Transportation and Franchising and Regulatory Board (LTFRB) Region 8, nga nakabalaong daw iton pandemya ha pagpapatuman han pagmomodernisa han mga jeepney ha nasud sanglit waray ine mahi-iimplementar.
Sumala kan Veronica Reposar, Information Officer hiton Land Transportation Franchising and Regulatory Board (LTFRB) Regional Office 8, dida pa daw han tuig-2019 in dapat nga fully implemented na iton PUV modernization pero kay mahitungod nga umabot an COVID-19 in nadelatar an pagmodernisa han mga ine.
Dugang pa han mao nga opisyal, waray gihapon mga nagmamanupaktura han mga sarakyan ngan gin undang an ngatanan nga operasyon.
Mababaruan naman nga kutob nala ngada hiton Hunyo 30 han presente nga tuig, an gintutugot nga pagbiyahe han mga tradisyunal nga jeepney mahitungod hiton ginbubuhat nga modernisasyon ha mga sarakyan.
