Ginduon han prosecution ha ikaduha ka-adlaw han impeachment trial kontra kan Vice President Sara Duterte nga klaro nga pagtalapas ha pagtapud han publiko an nagin pahayag hini nga mga panarhog ha kinabuhi nira Pres. Ferdinand Marcos Jr., First Lady Araneta-Marcos, ngan anay House Speaker ngan Leyte First District Rep. Martin Romualdez.
Ha pagdungog dida han Martes, Hulyo 7, ginatubang han prosecution an mga kopya hanmga pahayag ni Vice President Duterte dida han Nobyembre 23, 2024, ngan ibapa ngamga masunod nga pahayag.
Ginpakiana ni Senator-Judge Risa Hontiveros kun kay-ano gintutudlok nga mabug-at ngabasaranan ha impeachment an nasabi nga pahayag.
Sumala kan privat prosecutor Atty. Amando Ligutan, ginpapakita han mga ini nga may plano o sistema an nasabi nga panarhog, kaupod an pagkontrata ha usa nga hitman.
Ginduon ni Ligutan nga dire normal an panarhog ha kinabuhi han usa nga nakalingkod nga Presidente ngan amo gihapon an pinaka-siyahan nga higayon nga nahitabo ini ha kasaysayan han nasud.
Gintagan-duon pa han prosecution nga an nasabi nga pitad in “110 percent” nga pagtalapas ha pagtpaud han publiko ha Bise Presidente.
