Ha ikatulo ka-adlaw han impeachmennt trial ni Vice President Sara Duterte, dida han Miyerkules, Hulyo 8, ginmalatumat han iya kampo nga an mga panarhog niya kontra kan Presidente Ferdinand Marcos Jr., in bunga han pagkakadakop ha iya chief of staff nga hi Zuleika Lopez.
Sumala ha depensa, duro nga naapektaran an Bise Presidente han ma-detail hi Lopez han House of Representatives mahuman ini ma-contempt ha gindumara nga imbestigasyon kasumpay han confidential funds han Office of the Vice President.
Ha pagdungog, ginpakita pa han kampo ni Duterte an video kun diin makikita nga nagtutuok ngan nabarabidad hi Lopez ha plano nga igbutang hiya ha Women’s Correctional Facility samtang hiya in aada ha kustodiya han Kamara.
Sugadman, ginklaro han depensa nga dire nira ginyayakan nga insakto nga pamatasan an panarhog. Karuyag la nira ig-eksplikar an sitwasyon nga gintikangan han isyu.
Padayon naman nga gindudungog han impeachment court an Article IV han impeachment complaint kontra kan VP Sara. Ini in kaparte han kaso nga naghihisgot ha grave threats kanda Pres. Marcos, First Lady Liza Araneta-Marcos ngan anay House Speaker Martin Romualdez.
