CALBIGA, SAMAR – Usa na liwat nga disgrasya ha kadalanan nga ginkakadabihan hin pampasaheros nga van an nahipatik ha Brgy. Canticum, Calbiga Samar.
Sumala kan Calbiga Municipal Police Station Officer in Charge, PCpt.Fernando Calabria Jr., madalunot an nasabi nga lugar kun diin haros kada semana in mayda nadidisgrasya.
Usa pa ha nakikita nga rason han disgrasya in an duro na hin kamanipis han kaliding han nasabi nga van kun diin haros dire na ine nadukot ha karsada.
Mayda naman unom nga pasaheros an nasabi nga sarakyan kun diin usa ha mga ine an ada ha seryoso nga kabutang.
Damo naman daw na an nagpakabutang na nga warning device ngan signages ha nasabi nga lugar pero damo la gihapon an nadidisgrasya hine.
Mababaruan nga ine nga lugar in amu gihapon an kaparehas nga lugar nga nadisgrasyahan han pampasaheros nga van nga sumurop ha usa nga balay dida han mga nakalabay nga semana.
Samtang, waray naman magpasaka hin kaso an mga biktima, pero babatunon han kumpanya han sarakyan an gastos ha pagpapatambal han mga ine.
