TACLOBAN CITY – Nagtutuo an pamilya ni AFP Chief of Staff Andres Centino nga angayan an iya utro nga pagkakatudlok kumo tagmangulo han sandatahang lakas han nasod ha kaluyo han mga kontrobersiya nga kasumpay ha iya pagbalyo kan Lt. Gen. Bartolome Bacarro ha mao nga posisyon.
Una hine, ginhikalasan an kadam-an hautro nga pagkakatudlok kan Centino kumo chief of staff han AFP matungod nga panalagsa la nga natatabo an reappointment hiton chief of staff ha sandatahang lakas han nasod.
Sumala hiton bugto ni AFP Chief of Staff Andres Centino, nga hi Flaviano Centino Jr., Board Member han 4th District of Leyte, nagtutuo hira nga angay la para ha iya bugto an nasabi nga reappointment matungod ha mga achievements ngan eksperyensya hine.
Ginsusuportahan daw gihapon nira an nasabi nga desisyon han Commander-in-Chief, nga hi Pangulong Ferdinand Marcos Jr.
Waray naman ine nagin komento kasumpay ha daw courtesy resignation ni anay Acting Defense Secretary Jose Faustino Jr. matungod nga waray kalabutan kasumpay ha reappointment ni Centino.
