TACLOBAN CITY- Iginkalipay han pamilya ni anay Calbayog City Mayor Ronald Aquino nga napalusaran na hin warrant of arrest an 9 nga mga kapulisan nga dabi ha pan-ambush patay ha mao nga alkalde.
Sumala kan Mark Aquino, anak ni anay Calbayog City Mayor Ronaldo Aquino, nga ini in nagpapakita la nga hinay hinay nga natatagan hin hustisya an kamatayon han iya tatay.
Dugang pa hini nga diri maundang an ira pamilya hangtud diri natutudlok an tinood nga mastermind ha pagkamatay han iya amay ngan diri pa nira nakakab-ot an tinood nga hustisya.
Mababaruan nga dida han Pebrero 14, nagpalusad hin warrants of arrest an Calbayog City Regional Trial Court ( RTC ) Branch 32 ala kontra kan PLtCol. Hayre Sucayre, PMAJ Shyrile Tan, PCapt. Dino Goles, PLt. Julio Armeza, PSSgt. Neil Cebu, PSSgt Edcel Omega, Patrolman Niño Salem, PCorporal Julius Garcia, ngan Pssgt. Rndy Merelos.
Maatubang an mga ini hin upat ka counts hin kaso nga murder ngan usa nga kaso nga frustrated murder nga ginpalusad ni Judge Cicero Lampasa.
Waray ginrekomenda nga piyansa an huwis ha ira kaso nga murder samtang 200 mil naman an kapyansahan han ira kaso nga frustrated murder.
Manunumduman nga Marso 8, 2020 han ginpanmumusil patay hi Mayor Aquino ha Labuyao Brigde ha Calbayog City Samar.
