TACLOBAN CITY – Iginduduso ha Kamara de Representantes ni TINGOG Party list Rep. Jude Acidre an House Bill 10648 o Pambansang Agapay sa Pamilya at Maliliit na Negosyo (PAMANA) Act.
Panuyo han nasabi nga balaudnon nga maghatag hin binulan nga digital subsidy nga nagkakantidad hin P1,000 o P12,000 ha usa katuig ha mga minimum-wage earners ngan low-income families nga dire sakop han 4Ps.
Sumala kan TINGOG Party list Rep. Jude Acidre, baton ini ha araba han mga empleyado nga dire nahibubulig ha panhatag han mga ayuda sugad han 4Ps, Walang Gutom Program ngan iba pa.
Dugang pa ni Acidre, an nasabi nga programa in mayda duha nga panuyuan: Syahan in makaghatag hin kadugangan nga bulig ha mga minimum-wage earners nga dire lakip han 4Ps ngan cash assistance. Ikaduha, mabuligan an mga gudti nga negosyo nga magkamay-ada hin halin kun diin an mga pondo nga igbubutang ha mga e-wallets han mga benepisyaryo in gagamiton ha pagpalit ha mga gudti nga tindahan.
Samtang, lain ha tradisyunal nga paghahatag han ayuda, an binulan nga P1,000 in direkta nga ighuhulog ha credited nga e-wallet han benepisyaryo nga naka-link ha Philippine National ID hini ha ilarom han Bangko Sentral ng Pilipinas.
Pangungunahan naman han Department of Social Welfare and Development an mangunguna han panrehistro han mga benepisyaryo agud magsarahid an panhatag sugadman magin patas an proseso han pagpili.
Sumala pa kan Acidre, duha la an gin aaro nga rekisitos han nasabi nga ayuda—kinahanglan dire membro han 4Ps ngan minimum-wage earner.
Gin klaro gihapon han magbabalaod nga dire cash an ighahatag kundi madiretso ha credited nga e-wallet han benepisyaryo an ayuda.
Ha pagkayana, naipasa na ha komite an nasabi nga balaudnon ngan ginhuhula pa an pag-apruba hini.
