TACLOBAN CITY – Nagpahimatngon an Palo Traffic Auxiliary Unit o kun PATU ha mga motorista nga naagi ha bungto hitun Palo partikular na ha may Traffic light ha may library nga maghirot ngan magkita ha mga traffic signs agud nga maiwasan itun mga aksidente.
Ini manggud in kasunod han mga damo nga mga sarakyan an nahihipatik nga naaksidente ha mao nga lugar tungod nga diri nakita han island nga aada ha butnga han highway nga kun diin, an pira hinin dinhi in nabunggo ngan mayda pa mga sarakyan nga napapabawbaw han mao nga island.
Sumala kan Babit Abaña, in-charge hitun Palo Traffic Auxiliary Unit o kun PATU, in basar ha ira naoobseran nga mga naaksidente in mahitungod nga itun iba in nagpakainom, nagpapaspas ngan diri nagsusunod han mga traffic signs sugad nala hitun pagdiri han pag u-turn ha katapusan han island.
Waray naman daw may naaksidente nga nagreresulta hin dako nga danyos o mga casualty kundi mga minor injuries nga kun diin, dayon naman ini nga ira gin aaksyunan.
Dugang pa ni Abaña nga diri liwat puydi nga tanggalon nala o pahaliputon an island mahitungod nga mayda ini standard nga ginsusunod nga kun diin, an mga eksperto an nagbutang.
Nagpapasalamat naman hiya han mga nakakaobserba ngan ginpatapod nga iya igpapadangat ha Lokal nga Panggobyernuhan han Palo an mga natatabo ha may island han traffic light ha library ha mao nga bungto agud nga matagan dayon hin solusyon
