TACLOBAN CITY – Ginmalatumat ni Philippine Chamber of Commerce and Industry Tacloban & Leyte President, Eugene Tan nga dire rason han kapakyas nga makagre-new han pira nga mga negosyante an panarado han ira mga establisyemento ha siyudad.
Sumala kan Tan nga damo iton rason kun kay ano nanarado iton mga tindahan sugad nala iton waray nagbabantay, waray may naliwan kumo tag iya labi na kun ini in usa nga generational nga establisyemento, ngan kun dire na ini nakakaganansiya.
Dugang pa hini nga dire rason an pakyas makagpa-renew han ira business permit matungod nga pira ka bulan ugsa iton deadline in naniningkamot na iton mga negosyante makapabag-o hiton ira kaangay nga dokumento agud malikayan iton problema ha ira pakabuhi.
Samtang, sumala naman hini nga posible temporaryo laanay nga nagsara an iba nga mga tindahan mahitungod nga normal mangud nga mahinay ngan maluya iton negosyo ha mga siyahan nga mga bulan labi na kun kahuhuman la iton mga holiday season kun diin, dako iton nagagasto han mga negosyante ha utilities, manpower, ngan iba pa nga mga kinahanglanon ha ira negosyo.
