NATIONAL – Kinontra ni House Prosecution Panel spokesperson Atty. Antonio Audie Bucoy an pahayag ni Senate Pres. Francis Escudero nga waray limitasyon an kapas han impeachment court.
Syahan na nga ginpahayag ni Escudero nga an impeachment court in mayda haluag nga Constitutional authority para magdesisyon ha bisan anuman nga mosyon.
Sugad han kabahin ha desisyon nga ig remand o igbalik ha Kamara an Articles of Impeachment kontra kan Vice Pres. Sara Duterte.
Ha pag-atubang ni Atty. Bucoy ha media, ginmalatumat hine nga mayda limitasyon ha Batakan Balaod pati ha mismo nga impeachment rules, sanglit dire pwede nga “bardagulan” ito.
Dugang pa hine, dire porke “sui generis” o kakaiba an istoryahon in pwede na nga himuon an ngatanan nga karuyag hine.
Pagklaro pa hine, dire pwede nga magmando nala hin bisan anu, mahitungod nga sayop ine ngan kinahanglan in subay ha parameters han Konstitusyon an ngatanan.
Ginpahayag hine nga ha masunod nga mga adlaw in magpa-file an prosection panel o mag-aalutahan hin mga kaangayan nga pleading nga posible magin usa nga mosyon o manifestation.
