TACLOBAN CITY – Nagin mahimyang an pagtapo han Undas ha siyudad han Tacloban kun diin, waray may nahipatik nga bisan ano nga insidente.
Sumala kan Tacloban City Police Office Information Officer PLTCOL Allan Camasin, nga nagin malinampuson an mahugot pagbabantay han mga kapulisan ngan an mga kaupod nga force multipliers ha pagsalin-urog han pista minatay ha siyudad.
Dugang hini nga nag hatag hin kooperasyon an mga molupyo ngan sumunod an mga ini ha mga ginpalusad nga mga aludayday kaparte hiton Undas rason han pagigin mahimyang han mga sementeryo ha luyo han pangulpot han mga ginatos-gatos nga bisita.
Nagpapasalamat naman hi Camasin ha mga otoridad nga nagpaka-standby ha mga sementeryo nga dayon nga narespondehan an mga emergency ha dalan nga nahipatik durante han Undas.
Samtang, ginsigurado naman hini nga ira igpapabilin an kahimyang ha siyudad ha tanan nga mga selebrasyon dire la ha Undas agud maproteheran gihapon an siguridad han mga molupyo ngan talwas nira ini matatapo.
