Umapela an labor group nga Partido Manggagawa ha administrasyon Marcos nga ig-sertipika na kumo ‘urgent’ an panukala nga dugang nga P200 ha inadlaw nga sweldo han mga mananarabaho nga Pilipino.
Ginbuhat han grupo an nasabi nga apela kadungan han selebrasyon han Labor Day, kakulop nga adlaw, Mayo 1.
Ha pakighimangraw han Bombo Radyo kan anay Rep. Rene Magtubo, Chairman han nasabi nga partido, ginmalatumat niya nga mas damo nga magbabalaod an nasuporta ha nasabi nga panukala, labi na ha Kamara de Representantes, pero dire ini nakakalahos ha lebel han Senado.
Pag-eksplikar han labor leader, bisan man kun dida han 19th Congress in nakakuha na ini hin sakto nga suporta tikang ha Kamara, waray ini swetiha nga makalahos ha Senado mahuman nga ipiton han nakalabay nga Senate leadership.
Sugadman, kun igsi-certify la ini han Presidente kumo ‘urgent’ ngan igkokonsidera kumo ayuda ha mga mananarabaho, magigin dako nga bulig ini ha mga Pilipino nga padayon nga nagkukuri mahitungod ha hamubo nga pasweldo.
