LEYTE – Padayon an pagpapatuman hin mas mahugot nga seguridad ha bug-os nga probinsya han Leyte kumo kaparte han pinahuru-hugot nga direktiba para ha mas madagmit nga baton han mga kapulisan ha mga insidente, partikular ha mga tawag ha 911 emergency hotline.
Subay ha lokal nga pangobyernuhan, ginpapakusog an presensya han kapulisan ha mga matao nga lugar, sugadman ha mga lugar nga mas hitaas nga hulga ha seguridad. Kaupod ha mga pitad an mahugot nga pagbabantay ha mga checkpoint, control point, ngan border controal points, subay ha intel-based nga deployment han mga tawuhan ha field.
Kaparte gihapon han operasyon an mahugot nga panginano gamit an datos tikang ha intelligence monitoring agud masigurado nga mayda sakto nga ngan dayun nga presensya han mga otoridad ha mga kritikal nga lugar.
Iginpapatuman na gihapon ha rehiyon an target nga 5-minutos nga response time ha mga insidente nga gintatawag ha 911. Bisan man kun mayda pira nga ayat ha kumunikasyon ha pira nga tay-aw nga lugar, labi na kun mayda maluya o waray signal, in padayon la gihapon an nasabi nga inisyatibo agud mapun-an ine. Usa na hine an paggamit hin push-to-talk over cellular (POC) radios nga nakadepende ha signal han mga telco.
Kadungan hine, nakikigsumpayan na gihapon an mga istasyon ha mga lokal nga Wi-Fi providers agud magkamay-ada hin alternatibo nga koneksyon ha komunikasyon, sugad han paggamit han PISO Wi-Fi.
Bisan ha mga higayon nga dire dayun naaabot an 5-minutos nga baton, ginsisigurado han kapulisan nga mayda dayun nga aksyon ngan presensya ha kada report han insidente.
Samtang, nagpapabilin naman nga hamubo an ihap han dagko nga krimen ha nakalabay nga bulan. Kadam-an han mga nahipapatik nga kaso in may paghisumpay ha petty crimes o minor offenses, kun diin an pira in na-konsummate ngan an iba in na-frustrate, subay ha datos han kapulisan. (via Bombo Shiela Encio)
