Magpapagawas na hin desisyon an Impeachment Cout ha Lunes, Hulyo 20, kasumpay ha hangyo han House prosecution panel nga i-subpoena an tax, bank, ngan Anti-Money Laundering Council records ni Vice President Sara Duterte ngan an iya asawa nga hi Atty. Mans Carpio.
An magigin desisyon in kasunod han gindumara nga caucus han mga senator-judge dida han Miyerkules han kulop.
Sumala ha Presiding Officer Francis “Chiz: Escudero, nagkasarabot an mga senador nga tagan hin insakto nga panahon an kada tagsa agud pag-istudyohan an mga “complicated issues” nga may pag hisumpay ha pagpapagawas han subpoena.
Kasumpay hini ginmalatumat ni Atty. Micheal Poa, usa ha mga abogado ni VP Sara nga dire ginbabalabgan an pagpapagawas han financial records han Bise Presidente pero klaro an nagin posisyon han Korte Suprema kasumpay ha urusturyahon han privacy ngan proseso hini, sanglit ini la an ira ginpapahimatngun ha mga senator-judges nga mahugot nga kitaon an ira desisyon.
Samtang, gin-withdraw naman han House prosecution panel an pagpapatawag ha lima ha ira nabibilin nga testigo kasumpay han Article 4 han impeachment complaint, nga naghihisgot ha panarhog ni VP Sara kontra kan Pres. Ferdinand Marcos Jr., First Lady Liza Araneta-Marcos, ngan anay House Speaker Martin Romualdez.
