TACLOBAN CITY – Dako nga bulig ngan para han kaupayan han ngatanan an positibo nga epekto han pagpapahitaas han weight load limit capacity han San Juanico Bridge tikang ha 3 tons tikadto ha 15 tons.
Ine in sumala kan Philippine Chamber of Commerce and Industry Tacloban and Leyte President, Eugene Tan.
Dugang pa hine, bisan paman kun dire pa gud makakaagi an mga 10-wheelers o 12-wheelers nga mga truck in nadugngan naman an kabug-at han mga kargamento nga pwede igbiyahe pinaagi han pagtalabok han tulay.
Ha pagpahitaas han weight load limit han tulay in madepende na daw ha mga tindahan kun anu nga mga estratehiya an ira hihimuon agud makatabok ha tulay nga dire malahos ha 15T an kabug-at han dara han ira mga sarakyan.
Para han mga 10-16 wheelers nga truck in pwede naman an mga ine tumabok ha Leyte o Samar gamit la gihapon an mga roll on/roll off (RoRo) vehicles agud makatipid la gihapon ha oras han pagde-deliver ngan pagdidiskarga.
Mas dako daw manggud an magigin gastos ngan makaon gihapon hin dako nga oras kun magdo-double handling o magdidiskarga ngan karga gamit an guru-guti nga sarakyan an mga ine para la makatabok ha tulay.
Ha lain nga bahin, pormal naman nga aabrihan an 15-ton bridge capacity han tulay yana nga adlaw, Biyernes, Disyembre 12, kun nakatalaan gihapon nga umatender ha pag-aabri hi Presidente Ferdinand Marcos Jr. para mag-inspeksyon.
