Nagpagawas hin pahimatngon an Philippine National Police – Anti-Cybercrime Group (PNP-ACG) kontra ha ginlalauman nga pagdamo han mga kaso han panguwat ha internet kasunod han pagpapatuman han 4-day work week ngan work-from-home nga set-up ha pira nga ahensya han gobyerno.
Sumala kan PNP-ACG Director Police Brig. Gen. Wilson Asueta, dako an posibilidad nga singabuton han mga sindikato an mas halaba nga oras nga ig aalutaga han mga empleyado ha online platforms samtang hira in aada ha ira mga panimalay.
Pag-eksplikar ni Asueta, ginlalauman nga mahitaas an aktibidad ha online shopping ngan pagpapa-deliver hin mga produkto mahitungod nga maiibanan an adlaw han paggawas han mga empleyado.
Manunumduman nga epektibo na an ginpahaligot nga adlaw han pagsulod ha mga opisina han pira nga empleyado han gobyerno kumo baton ha direktiba ni Presidente Ferdinand Marcos Jr nga magtipid hin konsumo ha enerhiya.
Labot ha pamalit ha internet, mahugot gihapon nga ginpapaghirot han otoridad an publiko ha mga nagsasarang nga peke nga accommodation ngan tour packages yana nga tikaharani an Semana Santa.
Basar hiton urhi nga datos han PNP-ACG, umabot na ha 29 nga kaso han scam nga mayda koneksyon ha bakasyon an ira nairehistro tikang pa la dida han bulan han Enero kutob Pebrero.
Resulta hini, gin abisuhan an publiko nga magin vigilante ugsa magpagawas hin kwarta ha anuman nga transaksyon ha internet.
