PALO, LEYTE – Ginkilala han selebrasyon han National Arts Month an mga ‘artists’ ha bug-os nga nasud.
Sumala kan National Commission for Culture and the Arts National Committee on Music Head, Dr. Maria Alexandra Chua, an National Arts Month in espesyal mahitungod nga ginre-representa hine an kolektibo nga pagpapahayag nga an pagigin ‘creative’ han mga Pilipino in buhi, ginpapasidunggan, ngan importante ha kinabuhi han nasud.
Ha gindumara nga Pagsalin-urog: The 2026 NAM in Palo for the Visayas, an tema han National Arts Month 2026 in Ani ng Sining: Katotohanan at Giting.
An Ani o harvest in nagpapahayag hin probisyon, ginkikilala hine an paningkamot han mga artists, an halaba nga oras ha sulod han studio, an pira nga tuig nga praktis, ngan an mahilom nga dedikasyon agud makahimo hin art para makita han bug-os nga nasud.
An Katotohanan o truth, in nagpapahinumdom nga an artists in an konsensya han sosyedad pinaagi han literatura, kanta, teatro, ngan visual art. An artist an nakapot han salamin nga nagpapakita han kolektibo nga reyalidad han katawhan, ha parehas kaperdihan ngan kadaugan.
Ngan an Giting o courage, in an naghahatag hin kusog ha usa nga artist nga magpadayon ha kaluyo han makusog nga ‘demand’ han publiko hin pagkakaparu-pareho han kada usa.
Dugang pa ni Chua, an tulo nga konsepto in dire mga ‘abstract ideals’ kundi mga pundasyon ha kun ano an gintutukod han aton nasyon.
