TACLOBAN CITY- Ginkumpirma han pamunuan han Department of Health Eastern Visayas Regional Office 8, nga nagtika-hitaas an kaso han COVID-19 han mga naglabay nga semana.
Sumala kan Dra. Exuperia Sabalberino, Regional Director han DOH 8, nga an tigda nga paghitaas han ihap han kaso han COVID-19 ha rehiyon in nakaka-alarma kun diin maabot ha 186 an kabug-usan nga ihap han mga nahidugang nga kaso han mao nga sakit ha bug-os nga rehiyon han nakalabay nga adlaw.
Dugang pa hine nga naobserbaran nira an tigda nga paghitaas han kaso han nakalabay nga 2 ka semana. Subay ha nagawas nga mga resulta han mga nag popositibo han mao nga sakit ini in matungod nga damo nga mga indibidwal nga daan na nga may mga sintomas ngan nagiginawas la gihapon an mga ini.
Usa naman nga namonitor han mao nga departamento panlawas in mayada pipira nga nagtanggal na han ira mga face mask o adton dire na nagsusul-ot hin face mask. Sanglit nga nagpahinumdom ine ha publiko nga dayon la gihapon nga sundon an mga ginpapatuman nga heatlh protocols agud nga makabulig ha pagpugong han nagpapadayon nga virus.
