TACLOBAN CITY – An padayon nga paghinitaas han presyo han mga panguna nga papliton ngan produktong petrolyo an pira ha mga ginbasehan ha pagkaada hin panibag-o nga wage order nga nagpapahitaas han minimum wage han mga empleyado ha bug-os nga rehiyon otso.
Una hini, gin-aprubahan na ha rehiyon an P50 increase ha kinada adlaw nga sweldo han mga mananarabaho kun diin igpapatuman ini ha duha ka-tranches.
Sumala kan Colai Go, Director han Tacloban Filipino Chinese Chamber of Commerce Inc, an mao nga wage order in dire la nagkakaharayo ha ira proposal nga P40 increase ha daily minimum wage.
An syahan nga trance hini o an 25 pesos increase in igpapatuman ha masunod nga bulan han Hulyo, 15 kaadlaw mahuman an publication samtang an kadugangan nga 25 pesos in igpapatuman naman ha Enero 23, 2023.
Dugang pa ini Go, an pag implementar hini pinaagi hin duha ka-tranches in agud nga dire matigdaan an mga negosyante ngan mabalanse ini para ha mga employers ngan mga empleyado.
