TACLOBAN CITY – Gintatawag daw nga “super delayed” iton paghingayad han Tacloban Daniel Z. Romualdez Airport mahitungod nga duro na hin kadelatar an pagtrabaho hine.
Gintikangan manggud pagtrabahua an nasabi nga airport dida pa han nakalabay nga tuig-2020 kun diin nakalataan ine nga mahuman dida hiton tuig-2025 pero malabo daw ine nga mag-abri dida hiton 2025 mahitungod nga ha tulo nga phases in ada pala ha phase 1 an paghingayad hine.
Sumala kan Atty. Buenaventura “Junie” Go-Soco, Representative hiton Private Sector Eastern Visayas Regional Development Council ngan Former NEDA Vlll Regional Director, ha phase 1 pala in duro na ine hin kaatrasado mahitungod nga nakalataan manggud nga mahuman an phase 1 dida pa han May 2022 pero hasta ngada yana in dire pa ine natatapos kun diin gindus-og nala ine nga mahuman ngada hiton Marso ha masunog nga tuig.
Labot la han Phase 1 in may-ada pa kinahanglan humanon nga Phase 2 ngan Phase 3 para makompleto an paghingayad hine.
Dugang pa hine, damo la nga rason an ginyayakan han mga nahitutungdan hine sugad nala hiton malain daw an panahon mahitungod han COVID-19, kulang an mga materyales, ngan iba pa sanglit dako daw an posibilidad nga dire pa ine mag abri dida hiton 2025 kundi ha 2027 pa, basar daw hiton track record ha pagkayana.
