TACLOBAN CITY – Nagpapadayon an paghingayad han mga Yolanda housing projects han National Housing Authority para han mga nagin biktima han Bagyong Yolanda, partikular na an mga nawarayan han mga panimalay ngan sugad man an mga nangungukoy ha mga no build zone area nga harani ha mga kadagatan.
Sumala kan Engr. Constancio Antiniero, Regional Manager han National Housing Authority Region 8, aada na ha 78 ha 119 nga mga housing projects ha bug-os nga rehiyon 8 an nakumpleto na nga maayad nga kun diin, ginkokompunir na ini hin 63,155 nga mga housing units.
Ginpatapod gihapon ni Antiniero, nga mahuhuman na ini nga mga nabibilin nga mga housing projects sunod nga tuig 2023 nga kun diin, eksakto 10 na katuig o usa na ka dekada mahuman an paglasurbo ni Super Typhoon Yolanda ha rehiyon 8.
Gin aaghat gihapon han buhatan an mga yolanda victims nga pumakadto ha ira tagsa tagsa mga local government units agud magpalista ngan waray may manabo nga duplication han mga beneficiaries labi na nga amo daw ini an trabaho han mga LGU’s ngan diri an NHA.
