TACLOBAN CITY – Gintutugutan daw an paggamit han mga single-use plastic bags ha mga merkado pero kinahanglan nga biodegrable o madurunot an mga ine.
Sumala kan Atty. Jerry Uy, City Councilor hiton Tacloban City, dida han ordinansa in nakasurat nga pwede gumamit hin mga single-use plastics kumo primary ngan secondary packaging han mga wet products pero kinahanglan nga biodegrable o nadudunot an nasabi nga plastic.
An City Ordinance No. 2023-15-06 o “An Ordinance Regulating the Use of Plastic Bags and Utilization of Poleyesterene as Packaging Materials in the City of Tacloban, and Prescribing Penalties for Violation thereof” in nagin balaod dida pa han nakalabay nga Marso 23, 2023.
Samtang, an Implementing Rules and Regulations (IRR) han nasabi nga ordinansa in naipasa na daw gihapon ha buhatan ni City Mayor Alfred S. Romualdez dida pa han nakalabay nga tuig ngan ha pagyakana in nagpapailarom pa han review ngan pagpinalisa.
Dugang pa ni Uy, pwede naman daw magdara hin ira mga kalugaringon nga surudlan sugad hiton eco bag o basket an mga mamaralit kun nadire an mga ine nga pumalit ha gawas hin surudlan o magbitbit hin karton.
Ha datos naman han City Environment and Natural Resources Office in ada ha 120 katonelada kada adlaw an nakukuha nga basura ha syudad han Tacloban kun diin 12% o 15 katonelada han mga ine in mga plastic nga mga nakakaguba ha kalibungan.
