LEYTE — Utro nga ginparig-on han gobyerno han Pilipinas an importansya han Barangay General Assembly kumo pangunahon nga mekanismo han partisipasyon han molupyo, kasunod ini ha direktiba han Department of Interior and Local Government o DILG.
Sumala kan DILG Leyte Provincial Director, Johannes Dorado nga basar ha Section 397 han Republic Act No. 7160 o Local Government Code of 1991, ginmamandohan an kada barangay nga magbuhat hin assembly hin duha ka-beses kada tuig, agud paghisgotan han Sangguniang Barangay an ira mga programa, budget, nga mga isyu nga ginkakaatubang ha atubangan han komunidad.
Subay ha Proclamation No. 599 series of 2018, nga puydi pagbuhaton han Barangay Assembly Days ha Sabado o Dominggo han bulan han Marso ngan Oktubre kada tuig, agud masigurado an mas halawig nga partisipasyon han publiko.
Gineksplikar gihapon hini nga puydi mag-set o pumili an kada-barangay hin eksakto nga petsa han ira assembly basta ini in aada ha sakob han mga adlaw han Marso ngan Oktubre, ngan kinahanglan in igpasabot ini ha publiko agud masigurado an hataas nga attendance.
Dugang pa ni Dorado nga nagsisirbe gihapon an assembly kumo venue para ha open forum kun diin, puydi magpahayag an mga residente han ira opinyon, suhestiyon, ngan rekomendasyon agud ha igkakaribhong han ira komunidad.
Samtang, ha datos han DILG, yinukot-yukot nga barangay ha bug-os nga nasud an nagbubuhat naman hin assembly ha nakatalaan nga panahon kumo kaparte han pagpapakusog han transparency ngan accountability ha lokal nga pangobyernuhan.
