TACLOBAN CITY – Ginpahayag han Commission on Election (COMELEC) Regional Office 8 nga naging hapsay an proseso han pagdumara han local absentee voting ha rehiyon kasumpay han piniliay yana nga tuig.
Sumala kan Jenette Fariola-Ruedas, Information Officer han COMELEC 8, nagtikang han Abril 27 an local absentee voting para han mga governement officials, AFP ngan PNP members ngan sugadman mga miyembro han media.
Humagos naman ini kutob kakulop nga adlaw, Abril 29, kun diin kasagaran ha mga nag-apply para han local absentee voting in mga kapulisan ngan mga kasundaluhan sugadman an iba pa nga mga magseserbe ha adlaw mismo han piniliay yana nga Mayo 9.
Ginklaro naman han COMELEC nga an pwede la nga mabotosan ha local absentee voting in mga national positions la sugad han president, vice president, senators ngan partylist ngan dire an mga ini makakabotos para han local candidates.
