NATIONAL – Posible daw makabulig para maundang na an waray basaranan nga mga akusasyon an pagdiwara han kontraktor nga hi Curlee Discaya ha koneksyon hine kan anay House Speaker Martin Romualdez, sumala kan Tingog Party-list Representative Jude Acidre.
Iginkokonsidera gihapon han magbabalaod nga usa nga welcome development an denial ni Discaya nga naghahatag hin duon ha panginahanglan han evidence-based discourse ngan posible nga makabulig agud maundang na an pagpapasarang han waray basaranan nga mga alegasyon kontra ha mga gin ngaranan hin waray ebidensya.
Manunumduman nga lumutaw an alegasyon nga nagserbi daw hi Discaya kumo front kan Romualdez ha daw pagpalit han high-end real-estate property ha Makati City.
Pero igindiwara ine ni Discaya ngan ginklaro nga danay la niya nakita an anay House Speaker ha usa nga public event ngan waray ine niya makaistorya. Iginkassubo gihapon ni Discaya an paggamit han iya ngaran para danason an ngaran han anay house speaker ha kontrobersiya.
Ginmalatumat gihapon ni Discaya nga andam hiya akuon an nasabi nga propyedad ha Makati kun ine an karuyag han iya kritiko, bisan man kun dire ine tinuod.
Kasumpay hine, iginduon ni Rep. Acidre nga kinahanglan kun mayda man ebidensya in kinahanglan ine igpresenta ngan kun waray naman, igpaumaya nala ine ha publiko ngan ha mga tawo nga nahingaranan.
Nagpapabilin naman nga nakadetine hi Discaya ha Senado kasumpay ha pagkakadabi hine ha kontrobersiya ha flood control anomaly.
