TACLOBAN CITY – Nakatalaan nga ipatuman han Simbahang Katoliko an new normal nga pamaagi han pagdumdom o pagsalin-urog han Ash Wednesday yana nga maabot nga Pebrero 17.
Sumala kan Fr. Chris Arthur Militante, Social Media Coordinator han Archdiocese of Palo, tungod han nagpapadayon nga hulga han COVID-19 pandemic, imbis nga igpapahid ha agtang an agbon o abo, igbubudbod nala ini ha ulo o di man ngani ha alimpupuro han tawo.
Labot pa hini in pwede gihapon nga gumamit hin uga nga dahon partikular na an mga medicinal plant, para himuon nga abo o agbon.
Ha pagkayana in ginpapamulat pa an pagpagawas han guidelines tikang ha Arsobispo bahin han proseso han paghimo hin agbon sugadman ha pagsalin-urog han Ash Wednesday agud nga mabuhat ini ha mainampuon la gihapon nga pamaagi.
Utro na man nga nanawagan an Simbahang Katoliko ha publiko nga ha kaluyo han new normal protocols nga ginpapatuman in kinahanglan nga dire mangalimtan an pinakatumong han pagtigaman han Ash Wednesday labi na kumo tinikangan han kwaresma ngan pagpamalandong ngan pagbasul han mga kasal-anan han tawo.
