Posible nga sundon han Senado an nagin legal nga proseso ha impeachment trial ni anay Chief Justice Renato Corona dida han 2012 kun magpapagawas ini hin subpoena para ha tax records ni Vice President Sara Duterte, sumala kan Senate impeachment court spokesperson Regie Tongol.
Ha usa nga presscon, ginmalatumat ni Tongol nga naaprubahan na han impeachment court an hangyo han House prosecution panel nga magpagawas hin subpoena duces tecum ngan subpoena ad testificandum kontra ha mga opisyal han Land Bank of the Philippines ngan ha mga dokumento nga may paghisumpay ha Article I han impeachment complaint, nga naghihingaday ha sayop nga paggamit o misappropriation han confidential funds.
Nahibaruan nga an pag-subpoena in hihimuo pinaagi han ex-parte proceedings, sanglit waray rason an depensa agud pugngan an pagpapagawas hini.
Sugadman, posible la gihapon balabgan han kampo han Bise Presidente an pag-subpoena ha panahon han presentasyon han ebidensya, pagsasalawad hin mga dokumento, o pagpakiana ha mga testigos.
Gin klaro gihapon ni Tongol nga mas komplikado an istoryahon kun an gin aaro nga dokumento in bank records, tax records tikang ha Bureau of Internal Revenue (BIR), o mga report han Anti-Money Laundering Council (AMLC), mahitungod nga sakop an mga ini han magkadiru-dilain ngha balaod ha bank secrecy, taxpayer confidentiality, privacy, ngan iba pa nga legal limitations.
Nagpapabilin naman nga magkakaiba gihapon an panlantaw han mga eksperto ha balaod kun pwede ba kwestyunon ha Korte Suprema an subpoena nga igpapagawas han impeachment court.
Mayda mga nagpapahayag an Senado, kumo impeachment court, an may eksklusibo nga kapas nga ig-trial ngan resolbahon an mga impeachment case, sanglit dire basta pwede pakialaman han Korte Suprema an mga interlocutory orders hini.
