NATIONAL NEWS– Nanawagan hi Partylist Cong. Wilbert Lee ha Commission on Elections (Comelec) ngan Department of Health (DOH) nga siguraduhon an pagbubutang hin sadang nga medical teams ha mga voting precinct ha maabot nga piniliay, ine in maypaghisumpay ha kapaso nga naabat hiton nasud.
Sumala kan Lee, importante nga mayda mga doktor ngan nurse ha mga presinto agud nga dayon an mga ine makag-responde ha mga botante nga posible maigo hiton heatstroke, partikular na an mga senior citizen, PWDs, burod ngan may mga sakit.
Gin-aghat niya an Comelec ngan DOH nga pakusgon an koordinasyon ha local government units ngan Philippine Red Cross agud nga mapakusog pa an onsite medical response.
Ginsagdunan gihapon hine an mga botante nga magsul-ot hin presko nga bado, uminom hin damo nga tubig ngan magdara hin payong, kalo nga magagamit nga proteksyon kontra ha sirak.
