TACLOBAN CITY – Nagpahimatngon an Bureau of Fisheries and Aquatic Resources BFAR-regional office 8, partikular na ha mga benepisyaro nga parupangisda han fuel discount card nga ira ginpapandestrebwer hapagkyana ha mga pili nga mga lugar, nga gamiton han mga ine an fuel subsidy card nga ighahatag ha ira han mao nga buhatan.
Sumala kan Christine Gresola, tagapagyakan han BFAR-regional office 8, nga mayda nahereport ha ira buhatan nga may pipira nga mga benepisyaryo nga parupangisda nga namag-prenda han ira fuel discount card, kun diin dire ine kaparehos han kana 4PS ATM card nga gin-preprenda ngan magamit pag-withdraw ha mga ATM machines.
Gindig-unan han nasabi nga opisyal, nga mahugot ine nira nga gindidire matungod nga an fuel discount card nga ira ighahatag in eks-klusibo la ine nga magagamit ha mga accridited nga gasoline station kun diin pwede nga gamiton an nasabi nga discount card pagpalit hiton gasolina.
Dugang pa ni Gresola, nga pananglitan himuon hine han mga benepisyaryo in dayon ine nira nga ig didi-activate an mao nga fuel discount card.
Mababaruan nga presente yana nga nagdudumara hin pandestrebwer an buhatan hiton BFAR-8 ha Southern Leyte hin mga fuel discount card, kun diin panuyo hine nga mabuligan an mga parupangisda ha pagpapalit nira hin gasolina para magamit ha ira pangingisda, ine in kumo baton han padayon nga paghinitaas han presyo hiton lana ha bug-os nga nasod.
