NATIONAL – Nagsalawad hi Senate Committee on Basic Education Chairman Senador Sherwin Gatchalian hin balaudnon agud ibanan hin usa katuig an pag-aram han mga istudyante ha kolehiyo.
Tikang ha upat katuig, karuyag ni Gatchalian nga himun nala ine nga tulo katuig.
Pag-eksplikar han senador, pagsulod han istudyante ha kolehiyo, major subject na dayun an pag-aadman hine, samtang igbubutang naman ha Senior High School (SHS) an mga general subjects.
Dugang pa ni Gatchalian, an sugad nga sistema in ginpapatuman na ha magkaduru-dilain nga parte han kalibutan sugad han United Kingdom, Canada, ngan Australia.
Panuyo gihapon han pag-iiban hin tuig ha kolehiyo in agud malikayan an pag-uutro han mga courses ngan makag-pokus an mga kabataan ha ira specialization.
Kinahanglan daw gihapon ng igprayoridad an pagtutdo han mga soft skill ha mga istudyante ha Senior High School, kaupod an critical thinking, communication, problem solving, socio-emotional skills, creativity, ngan collaboration.
