Iginduon han usa ha magseserbi nga senator-judge ha impeachment trial ni Vice President Sara Duterte nga hi Senador Panfilo Lacson nga dire trabaho han Senate impeachment court an pag-aabri han selyado nga kahon han Bureau of Internal Revenue (BIR).
Lugod, kinahanglan daw nga umaro hin katugutan an House prosecution panel tikang ha Office of the President kun karuyag nira abrihan an BIR box.
Gin kasarabutan han mga senador ha ira cauces dida han Biyernes nga igbalik an selyado nga BIR box ha House prosecution mahitungod nga waray katungod an korte nga igtago o magin “gatekeeper” han mga ebidensya nga dire pa pormal nga igin aatubang ha pagdungog.
Gintagan-duon ni Lacson nga ha ilarom han Section 71 han Tax Code, an mga tax record in confidential ngan pwede la igpagawas o abrihan kun mayda nakasurat nga permiso tikang ha Presidente ha rekomendasyon han BIR ngan Department of Finance o pinaagi han waiver tikang ha respondent.
Nagpahimatngon gihapon hi Lacson nga kun igpirit han Senate impeachment court nga abrihan an kahon in waray sakto nga legal nga otorisasyon, in maibubutang an Senado ha kadelikaduhan nga makasuhan hin “grave abuse of discretion”.
Sumala kan Lacson, kinahanglan dire igpasa han prosekusyon ha Senado an pas-anon ha pag-aabri hini.
Dapat daw, ha Kamara de Representantes pala in umaro na hira han kinahanglan nga permiso ha Malakanyang ugsa ini igpadara ha Senado.
An selyado nga kahon in nagsusulod hin mga tax records ni VP Sara Duterte ngan han iya asawa nga hi Mans Carpio nga iginpasa han BIR ha House Justice Committee.
Mababaruan nga iginpasa ini han Kamara ha Senado hin dire gin aabirhan. Karuyag naman han House prosecution panel nga abrihan ini agud magamit nga ebidensya para ha Article II han Articles of Impeachment nga may paghisumpay ha “unexplained wealth” o dire mai-eksplikar nga karikuhan han Bise Presidente.
