Nababaraka an Philippine Chamber of Commerce and Industry (PCCI) nga an padayon nga paghitaas han presyo han petrolyo an magigin pinakamabug-at nga pas-anon para ha mga micro, small and medium enterprises (MSMEs) nga nabug-os ha haros kabug-usan nga sektor han negosyo ha nasud.
Sumala kan PCCI President Perry Ferrer, duro nga maapektaran an operasyon ngan kapas nga mabuhi han mga gudti nga negosyo mahitungod nga kaurugan in gutiay la gihapon an ira profit margins.
Gintagan-duon han opisyal nga duro kasensitibo an mga negosyo ha anuman nga pagkiwa han operating costs sugad han gastuson ha gasolina, transportasyon, ngan logistics.
Gintudlok gihapon ni Ferrer nga an enerhiya in nagseserbi nga kinabuhi han trading.
Dugang pa hini, kinahanglan maproteheran ngan mapadig-on an presyo hini agud dire maapektaran an pankabug-usan nga ekonomiya.
Mahitungod hini, iginpahayag han opisyal nga bug-os nga ginsusuportahan han ira han-ay an anuman nga pitad han gobyerno nga maipaubos an presyo han lana.
Gin pahimatngunan gihapon hini an publiko nga kun mapiritan magsarado an mga MSMEs—nga nagbubug-os ha 99.6% han business community han nasud—in dako nga problema an kakaatubangon han Pilipinas.
Samtang, kumo kaparte han pamiling hin solusyon, padayon an panawagan han magkadiru-dilain nga grupo ha sektor han transportasuon nga temporaryo nga tanggalon o suspendihon an iginbubutang nga excise tax ngan value-added tax ha mga produkto nga petrolyo.
Kasumpay hini, nagpatapod naman hi President Ferdinand Marcos Jr. nga pag-aadman han ehekutibo an posible nga pag-iiban ha mga nasabi nga buwis ha butnga han epekto han kasamok ha Middle East ha pankalibutan nga suplay han lana.
