Hinay-hinay na nga nabalik ha ensayo hi eight-division world champion Manny Pacquiao agud makondisyon an lawas hini ha iya pagbalik ha professional boxing.
Kasado na manggud an ginpapamulat nga rematch hini kan undefeated American champion Floyd Mayweather Jr. ha Setyembre nga pagbubuhaton ha Las Vegas, Nevada.
Sanglit, kinahanglan ni Pacquiao nga magpakondisyon hin maupay an iya lawas agud matagan hin maupay nga mulay an American fighter.
Gin aandaman gihapon ni Pacquiao an mulay hini ha masunod nga bulan kontra kan anay junior welterweight world champion Ruslan Provodnikov ha usa nga 10-round welterweight exhibition.
Nakatalaan an mulay ha Abril 18.
Urhi nga sumalang hi Pacquiao ha professional boxing dida han Hulyo 19, 2025, kun diin nakatumparak hini hi World Boxing Council (WBC) welterweight champion Mario Barrios.
Naghuman naman an mulay ha majority draw.
Ha lain nga bahin, masalang gihapon anay hi Mayweather ha usa nga exhibition match kontra kan Mike Tyson ha Abril ngan Mike Zambidis ha Hunyo.
