Igin aandam na han Philippine Crop Insurance Corp. (PCIC) an P36 million nga insurance payouts para ha 5,005 nga parag-uma nga nadistroso an mga pananom mahitungod ha Bagyong Luis ngan Maymay ngan ha Southwest Monsoon o Habagat tikang Agosto 1 kutob 11, 2026.
Subay ha Department of Agriculture (DA), ada ha P35.67 million an initial estimate han insured damages ha unom nga rehiyon.
Pinakadamo nga apektado nga parag-uma an nahipatika ha Region III o Central Luzon nga mayda 1,836, sinundan han Region I nga mayda 1,218 ngan Region IV-B nga mayda 836.
Pinakadako naman an insure lossess ha humay nga umabot ha P25.60 million. Kasunod hini an high-value crops nga P3.73 million ngan mais nga P3.55 million.
Ginmalatumat han DA nga ginmobilisa na han PCIC an mga regional offices hini para ha balidasyon han mga danyos ngan pagpapalaksi han pagproseso han mga insurance claims.
Sumala kan Agriculture Secretary Francisco Tiu Laurel Jr., importante nga dayun nga mabuligan an mga parag-uma ngan paru-pangisda mahuman an ada kalamidad agud malaksi hira nga makabakdaw ngan maipadayon an ira mga pakabuhi.
Samtang, ginmalatumat ni PCIC President Jovy Bernabe nga nagamit na gihapon hira hin bag-o nga teknolohiya agud mapalaksi an assessment han danyos ngan pagpagawas han insurance assistance.
Sugadman, posible pa magbag-o an initial figures samtang nagpapadayon an field validation han PCIC.
