Nakakuha hin kabug-usan nga premyo nga €47,195 o P3.3 million an Filipina tennis star Alex Eala ha kahuhuman la nga kampanya hini ha WTA 1000 Madrid Open mahuman umabot ha ika-duha nga round ha pareho nga singles ngan doubles.
Ha singles, nakakuha hi Eala hin €31,585 mahuman perdihon hi Anastasia Pavlyuchenkova ha syahan nga round.
Sugad pa man, natapos an iya laban han maperdi hiya kan Elise Mertens ha sumunod nga round.
Samtang, ha doubles naman naka-grupo ni Eala hi Zeynep Sönmez kun diin, manilampuson nira nga nadaogan an ira syahan nga kalaban.
Pero pakyas an mga ini magpadayon ha masunod nga round han ma perdi hira ha round of 16 laban kanda Katerina Siniakova ngan Taylor Townsend.
Ha kaluyo hini, nakapagtala hi Eala hin bag-o nga career-high ha doubles ranking mahuman sumaka ha No. 87 tikang ha anay No. 101.
Nakatalaan naman nga masabak hi Eala ha Catalonia Open tikang Abril 27 kutob Mayo 3 kumo pangandaman ha Italian Open.
Kaupod ha mga makakatubang hini ha torneo an top seed nga hi Canadian-Filipina Leylah Fernandez ngan iba pa nga mga players nga may higtaas nga ranggo ha kalibutan.
