TACLOBAN CITY – Nagpagawas na hin reward money nga P200,000 an Tacloban City Police Office ha kun hin-o man an makakagtudlok han kinamumutangan o impormasyon han suspek han pamusil kan Jessica Durana nga hi PSMSgt. Van Gregory Benitez.
Sumala kan PCol. Michael Palermo, City Director hiton Tacloban City Police Office (TCPO), mayda na warrant of arrest nga ginpalusad para kan Benitez ngan waray pyansa an kaso nga murder nga ginpasaka ha suspek.
Waray naman igpahayag han mao nga opisyal kun diin tikang an kwarta nga gagamiton kun reward money para han makakagtudlok han kinamumutangan ni Benitez.
Samtang, waray pa naman daw hira lead kun hain nagtatago an nasabi nga suspek ha pagkayana.
Manunumduman nga gin pusil-patay an biktima nga hi Jessica Durana dida han Mayo 3 ha presente nga tuig han suspek nga pulis nga hi PSMSgt. Van Gregory Benitez kun diin dayun ine nga kumalagiw mahuman an insidente. Nagdumara naman daw hin hot pursuit operation an mga otoridad pero waray hira makadakop han suspek.
An paghahatag naman daw han reward money in usa han ira pamaagi agud nga matudlok dayun an kinamumutangan han nasabi nga suspek.
