NATIONAL – Makakapalit na hin mas barato nga bugas an mga benepisyaryo han Walang Gutom Program (WGP) han Department of Social Welfare and Development (DSWD) ha ilarom han bag-o nga partnership, kaupod an Department of Agriculture (DA) ngan Kadiwa ng Pangulo.
Ha ilarom han nasabi nga inisyatibo nga gintawag nga “Benteng Bigas, Meron Na sa WGP,” puydi pumalit an mga benepisyaryo hin bugas ha kantidad nga 20 ka pesos kada kilo tikang ha mga DA-accredited retailers ngan Kadiwa outlets.
Sumala kan DSWD Secretary Rex Gatchalian, panuyo hini nga himu-on nga makaarakos an mga pagkaon ha nasod, labi na ha mga pamilya nga nanginginahanglan.
Samtang, makakabenepisyo gihapon han nasabi nga programa an mga solo parent, senior citizens, ngan Persons With Disabilities (PWDS) nga rehistrado ha WGP.
An kada pamilya in nakakakarawat hin 3,000 ka pesos kada bulan nga food credits pinaagi han electronic benefit cards han ahensya, nga magagamit ha pagpalit han bugas ngan iba pa nga mga pagkaon.
Target han WFP, nga mabuligan an 750,000 nga mga pamilya nga ira benepisyaryo pag-abot hiton tuig 2028.
