TACLOBAN CITY – Nakabalik na ha Sinirangan Bisayas an duha (2) nga mga Overseas Filipino Workers (OFW) nga nagtratrabaho Middle East nga taga Probinsya han Leyte agud nga malikayan an kadelikaduhan nga posible nga maidurot han kasamok nga natatabo ha butnga han Israel ngan Hezbollah fighters ha Lebanon.
An mga ini in taga Villaba, Leyte ngan Tolosa, Leyte.
Sumala kan Mary Catherine Pastor, OIC-Regional Director han Overseas Workers Welfare Administration (OWWA) Region 8 ha ginbuhat nga Kapihan sa Bagong Pilipinas han Philippine Information Agency (PIA) Eastern Visayas kakulop nga adlaw, in igin pasabot hini nga timprano pa daw nga nangaro hin bulig an mga ini nga nagpaabot hin interes nga makabalik ha nasud agud likyan an ka-ipit ha nagpapadayon pa nga kasamok.
Ginbabana-bana naman nga aada ha traynta (30) nga mga indibidwal nga taga Sinirangan Bisayas an nagtratrabaho ha Lebanon, nga kun diin, kaurugan daw dinhi in mga undocumented.
Dugang pa ni Pastor nga an mga mauli nga mga OFW’s in tatagan hin ayuda han gobyerno in labi na adtun tikang ha Lebanon ngan Israel.
Makakakarawat an mga ini hin 75 mil pesos tikang ha Department of Migrant Workers, 75 mil pesos tikang ha OWWA, ngan 20 mil pesos naman tikang ha Department of Social Welfare and Development.
