ORMOC CITY – Gin kumpirma han Ormoc City Police Office nga an babaye nga gin kidnap ha Brgy. Valencia, Ormoc City City dida han Hulyo 31, 2025 ngan an nakit-an nga naglulutaw nga lawas ha Brgy. Diit, Tacloban City kakulop nga adlaw, Agosto 4, in uusa la nga tawo.
Ginkilala an biktima kan Aquenee Arradaza, 35 anyos, ngan residente han Ormoc City.
Sumala kan Ormoc City Police Office Family, Juvenile, Gender, and Development Officer, PLt. Novah Tan, nagpa-blotter ha Ormoc Police Station 2 an manghud han biktima banda ala-11 han aga kakulop nga adlaw kasumpay han pagkidnapa ha biktima banda alas-9 han aga dida han Hulyo 31, harani ha usa nga remittance center han nasabi nga lugar.
Samtang, mahitungod han report nga mayda natad-an nga naglulutaw-lutaw nga patay nga lawas ha Brgy. Diit, Tacloban City kakulop nga adlaw, kaupod an pamilya han biktima in personal nga ginkumpirma han bugto han biktima an pangilal-an hine.
Sumala naman kan Tacloban City Police Office City Affairs & Development Unit Head, PLtCol Allan Camasin, nakilala biktima pinaagi han mga tattoo hine nga dream catcher ha tu-o nga parte han iya kagiliran ngan tattoo nga “CARMEL” ha may ubos nga parte han bungkog hine.
Dida han makit-an an biktima in nakaputos hin tela an nawong hine ngan ginpalibutan hin duct tape ngan naka-gapos gihapon an mga kamot hine ha iya luyo.
Waray na gihapon ine panapton han mahikit-an han mga otoridad.
Samtang, makikit-an naman ha kuha han CCTV footage nga ginsakay an biktima han mga armado nga grupo ha usa nga itom nga Toyota Wigo nga may-ada plate number 1799.
Ha pagkayana in padayon pa naman an gindudumara nga imbestigasyon han mga otoridad ngan ginhuhulat pa an resulta han autopsy examination nga gindumara han Regional Forensic Unit han Philippine National Police.
Nanawagan naman hi Camasin ha kun may-ada man nakakita han paghulog o paglabog han biktima ha may Diit in makigsumpayan la ha ira buhatan agud matagan hin lamrag ngan hustisya an panhitabo.
