TACLOBAN CITY – Ginkilala kumo safest city o pinakamahimyang nga syudad han bug-os nga nasud an syudad han Ormoc.
Ini in subay ha gindumara nga pag-aram han Philippine National Police (PNP) Crime Research and Analysis Center para han syahan nga quarter han tuig 2018.
Nahibaruan nga an syudad han Ormoc an nakakuha han pinakagutiay nga ihap hin insidente hin kriminalidad kun diin umabot la ini ha 134 ngan ginsundan naman ini han Cotabato City ha Maguindanao nga may 220 crime incidents ngan 227 naman haPuerto Princesa ha Palawan.
Nagtutuo an mga opisyales han syudad han Ormoc nga usa ha mga nakabulig para makab-ot an mao nga record in mahitungod han aktibo nga sumpayan ha butnga han mga kapulisan ngan mga residente han ira komunidad.
Samtang, an Quezon City naman an may pinakahitaas nga ihap hin kriminalidad nga umabot ha 12,252 ha syahan pala nga quarter yana nga tuig.
Sumunod naman an Manila nga 7,066 crime incidents ngan Cebu nga may 3,703.
