TACLOBAN CITY — Ginhihingita han usa nga lokal nga opisyal han Eastern Samar nga mas madugngan pa an tourist arrivals han probinsiya ha masunod nga tulo katuig.
Sumala kan Giporlos Mayor Mark Biong, maabot PHP841 million an income han probinsiya ha turismo han 2018.
Gutiay daw ini kon igkukumpara ha iba probinsiya han rehiyon.
Subay naman ha datos han Department of Tourism, aada la ha 5.19 percent an nagbisita ha Eastern Samar han 2017 kon diin humabubo pa ini ha 4.49 percent han 2018.
Ginahanglan daw nga mas dumamo pa ini ilabi na nga damo an maghusay nga mga tourist destination ha Eastern Samar kon igkukumpara ha iba nga lugar ha Pilipinas.
Sumala pa kan Biong nga target nira an 20 porsyento nga increase han tourist arrival ha ira lugar pag abot han tuig 2022.
Pero san-o ini mahitabo kinahanglan anay nga paupayon an mga imprastraktura tipakadto han mga tourism site, agresibo nga promosyon ngan sustinable nga mga tourism activities kon diin nasisiguro liwat nga nakabenepisyo an mga katawhan.
Mababaruan nga pira la ha mga sikat nga destinasyon ha Eastern Samar amo an Calicoan Island ha Guiuan, Yolanda beach ha Salcedo, Amandaraga Falls ha Lawaan, Dangkalan Pacific Beach ha Taft, nature parks ha Hernani ngan Balangkayan sugad man an Balangiga Bells.
Han 2017, ginbabana bana nga aada ha 1.46 million an turista nga bumisita ha Sinirangan Bisayas ngan 1.75 million naman an bumisita ha rehiyon han 2018.
